Watumishi wa umma sasa kufanya mazoezi mara moja kila wiki

Watumishi wa Umma wametakiwa kufanya mazoezi ya viungo Mara moja kwa wiki ili kujiepusha na magonjwa yasioambukiza ili kujenga watumishi wenye afya imara kwa maendeleo ya taifa.


Hayo yamesemwa na Mkurugenzi Msaidizi wa magonjwa yasioambukiza (NCD) Prof. Ayoub Magimba wakati wa kufunga mkutano Wa siku tatu wa Madaktari na wadau wa afya ngazi ya Mkoa na wilaya katika kupata mpango mkakati wa kujikinga na magonjwa yasioambukiza uliofanyika mkoani Morogoro.

“Katika mkutano huu wa kupata mpango mkakati wa kujikinga na magonjwa yasioambukiza tumeazimia kua na Sera inayoelekeza watumishi wote wa Umma wafanye mazoezi ya viungo siku moja kwa wiki ikiwa ni sehemu ya majukumu yao”alisema Prof. Magimba.

Aidha Prof. Magimba amesema kuwa mazoezi hayo ni sehemu ya majukumu ya watumishi wa umma ili kuwasaidia wale wanaokosa muda wa kufanya mazoezi majumbani kwao ili kujikinga na magonjwa hayo.

Mbali na hayo Prof. Magimba amesema kuwa watanzania wanatakiwa kuepuka matumizi ya Mara kwa mara ya Sigara na vileo kwa pamoja na badala yake wajikite kwenye mazoezi na utumiaji wa vyakula asilia.

Kwa upande wake Daktari bingwa Wa magonjwa ya ndani Dkt. Meshack Shimwela ambaye ni mshiriki wa mkutano huo amesema kuwa watanzania wanatakiwa kuzingatia na utekelezaji wa Sheria za barabarani ili kupunguza idadi ya vifo vinavyotokana na ajali mpaka kufikia mwaka 2030.