Askari waiomba Serikali kuwapa posho walizoahidiwa

Taarifa zilizotufikia hivi punde ni kwamba askari na maafisa mbalimbali wa Majeshi ya Ulinzi na Usalama hapa Nchini wanasikitika sana kuona ahadi wanazopewa na viongozi wa Serikali zikishindwa kutimizwa ndani ya wakati kama ilivyoahidiwa, pasipo kutolewa maelezo yoyote juu ya kushindwa kutimia kwa ahadi hizo.


Wakiongea kwa nyakati tofauti tofauti askari na maafisa wa Majeshi mbalimbali wameelezea masikitiko yao dhidi ya kile walichokiita SIASA WARIDI kwa kupewa ahadi nzuri na tamu zenye harufu nzuri huku zikishindwa kutimizwa ndani ya wakati na bila kutolewa maelezo yoyote, kiasi ambacho askari na maafisa wanabaki wakiishi kwa mategemeo makubwa huku hakuna kinachotimia.

Askari na Maafisa hao wamelalamikia na kusikitishwa na suala la kushindwa kuwekewa posho maalumu(package) kama mbadala wa vinywaji na bidhaa zote zilizokuwa zikipatikana katika maduka yao kwa muda wa miezi mitano(5) sasa, kama ambavyo imekwisha kutangazwa na Mheshimiwa Rais katika hafla mbili tofauti za kijeshi, pamoja na Waziri wa Fedha, Uchumi na Mipango wakati akisoma Bajeti Kuu ya Serikali Bungeni kuwa posho hiyo itaanza kulipwa kuanzia mwezi July 2016. Lakini mpaka sasa hakuna malipo yoyote yaliyofanyika.

Nikinukuu maneno ya mmoja wa Maafisa hao alisema;

"Ni aibu na hatari kubwa kwa Taifa kuona sisi askari na maafisa tukilalamika kupata stahiki zetu, lakini inafika hatua inabidi tupaze sauti ili ziwafikie wahusika wakuu waweze kutimiza na kutekeleza ahadi zao. Maana kazi ya ulinzi ni kazi ngumu sana Duniani yenye changamoto nyingi sana hasa hapa Nchini kwetu Tanzania. Kazi hii inatakiwa ifanyike kwa uzalendo uliotukuka na kujitoa kwa moyo wote, hivyo kushindwa kutimiziwa stahiki zetu sisi askari na maafisa kunapunguza hamasa na moyo wa kazi.
Serikali inapaswa iliangalie suala hili kwa kina zaidi, vinginevyo linapoza na kushusha hali na mioyo yetu sisi Wazalendo nambari moja hapa Nchini kwetu Tanzania"

Askari na Maafisa hao wanaiomba Serikali aidha iweze kuwaingizia posho hiyo au watangaziwe ni mwezi gani itaingizwa rasmi ili wawe timamu kuingoja kwa muda uliotajwa kuliko kukaa na kusubiri ahadi ya matumaini bila mafanikio yoyote.

Walinzi wetu hao wamemalizia kwa kusema kwamba wao wapo imara na hawatarudi nyuma katika kuhakikisha hali ya ulinzi na usalama Nchini inazidi kuimalika kila leo na wapo bega kwa bega na Watanzania wote katika kutimiza majukumu yao.